मिडियाबाजी डटकम काठमाडौँ , श्रावण ०८ । विश्लेषक प्रा. डा. सुरेन्द्र केसीले संविधान संशोधनभन्दा “चरित्र संशोधन” अहिलेको नेपालको मुख्य आवश्यकता भएको बताएका छन्। राष्ट्रिय प्रेस क्लबमा बिहिबार आयोजित अन्तरक्रिया कार्यक्रममा बोल्दै उनले प्रधानमन्त्रीले शिक्षा र स्वास्थ्य क्षेत्रमा लगाइएको कर सामाजिक सञ्जालको दबाबमा खारेज गरेको प्रसंग उठाउँदै अर्थमन्त्रीको औचित्यमाथि प्रश्न उठाए। “पढेलेखेका व्यक्तिले कर नीतिमै गल्ती गर्नु दुःखद हो,” उनले भने।

प्रा. केसीले नयाँ दलाई लामाको घोषणा नेपालमा भए गम्भीर भूल हुने बताए। पृथ्वीनारायण शाहको कालझैँ धार्मिक संवेदनशीलता देखिएको उल्लेख गर्दै हर्क साम्पाङको अभिव्यक्तिले धार्मिक सहिष्णुतामा असर पर्न सक्ने चेतावनी दिए।

उनले आत्मदाहजस्ता घटनाले समस्या समाधान नहुने स्पष्ट पार्दै “आज कुनै नेपालीले नेपालमा भविष्य देखिरहेको छैन” भन्ने धारणा व्यक्त गरे। संघीयतावादी र पहिचानवादी शक्तिहरूलाई जनताले मन नपराएकै कारण उनीहरूको प्रभाव घटेको दाबी गर्दै व्यक्तिवादी चरित्र भएका कारण बालेन शाह सबैभन्दा लोकप्रिय बनेको बताए।

क्षेत्रीय र अन्तर्राष्ट्रिय सन्दर्भमा उनले दक्षिण एसियामा शक्ति सन्तुलन खलबलिन सक्ने सम्भावना बढ्दै गएको उल्लेख गरे। भारतमा देखिएको “कक्रोच विद्रोह” शक्तिराष्ट्रहरूको चलखेल हुन सक्ने उनको अनुमान थियो। साथै, एक रुपैयाँको सिक्काबाट चुच्चे नक्सा हटाइएको विषय भ्रम हो कि भारतप्रति झुकाव हो भन्ने अझै स्पष्ट हुन बाँकी रहेको बताए। प्रा. केसीले चीनसँगको सम्बन्धमा पनि नेपालले अनावश्यक रूपमा तनाव सिर्जना गर्नु बुद्धिमानी नहुने उल्लेख गर्दै “चीनलाई जिस्काएर नेपालले काल खोजिरहेको हो कि भन्ने प्रश्न उठेको छ” भने।