इरानद्वारा ४८ घण्टे युद्धविराम प्रस्ताव अस्वीकार

काठमाडौँ । इरानले अमेरिकाबाट आएको ४८ घण्टे युद्धविराम सीजफायर प्रस्ताव अस्वीकार गरेको छ । अर्धसरकारी फार्स समाचार एजेन्सीका अनुसार उक्त प्रस्ताव बुधबार तेस्रो देशमार्फत तेहरान पठाइएको थियो। तर इरानले त्यसलाई स्वीकार नगरेको जनाइएको छ । यसैबीच, इरानले शुक्रबार अमेरिकाका दुई लडाकु विमान खसालेको दाबी गरेको छ । तीमध्ये एक एफ–१५ इ फाइटर जेट र अर्को ए–१० आक्रमणकारी विमान रहेको बताइएको छ ।

एफ–१५ माथि इरानभित्रै आक्रमण भएको जनाइएको छ। सो विमानका एक क्रु सदस्यको उद्धार गरिएको छ भने अर्का सदस्य अझै बेपत्ता रहेको जानकारी दिइएको छ । इरानी सञ्चारमाध्यमका अनुसार ए–१० विमान पर्सियन गल्फ क्षेत्रमा खसेको हो। यद्यपि, अमेरिकी अधिकारीहरूले भने उक्त विमान दुर्घटनाग्रस्त भएको वा खसालिएको भन्ने विषय स्पष्ट नभएको बताएका छन् ।