एसीसी यु-१९ प्रिमियर कपको फाइनलमा नेपाल

काठमाडौँ । एसीसी यु–१९ प्रिमियर कप क्रिकेटको फाइनलमा नेपाल पुगेको छ । ओपनिङ बलर नितेशकुमार पटेल र चन्दन रामको उत्कृष्ट बलिङले नेपालले शनिबार सेमिफाइनलमा मलेसियालाई ९ विकेटले पराजित गरेको हो । टस जितेको नेपालले मलेसियालाई अजमानस्थित सेभेन डिस्टिक ग्राउन्ड–२ मा पहिलो ब्याटिङका लागि निम्तो दियो । मलेसिया १७।२ ओभरमै ५१ रनमा समेटियो । नितेशले ८ ओभरमा २ मेडनसहित २४ रन खर्चेर २ विकेट लिए । चन्दनले ५ ओभरमा १ मेडन राख्दै १७ रनमा ३ विकेट हात पारे। कप्तान अशोक धामी र रोशन विश्वकर्माले पनि १–१ विकेट जोडे।

मलेसियाबाट नवौँ नम्बरका मोहम्मद फाथुल मुइनले ११ र हम्जाह पांगीले १३ रन बनाए । यी दुईबाहेक अन्य खेलाडी दोहोरो अंकमा पुग्न सकेनन्। मलेसिया ८ ओभरमा १३ रनमै ७ विकेट गुमाइसकेको अवस्थामा दुवैले इनिङ केही अघि बढाएका थिए।

जवाफमा नेपालले ८ ओभरभित्रै ५५ रन बनायो । निरजकुमार यादव ४ रनमा आउट भए पनि वंश क्षेत्री १७ बलमा ७ र निश्चल क्षेत्री १४ बलमा १० रन बनाएर अविजित रहे।

साउदी अरेबिया र हङकङलाई पराजित गर्दै समूह विजेता बनेको नेपालले अब युएई र ओमानबीचको अर्को सेमिफाइनलका विजेतासँग फाइनल खेल्नेछ।

• शनि, १३ मंसिर २०८२