काठमाडौँ । कप्तान लियोनल मेस्सीको उत्कृष्ट लय र ऐतिहासिक कीर्तिमानको मद्दतमा साविक विजेता अर्जेन्टिना जारी फिफा विश्वकप २०२६ को नकआउट चरणमा प्रवेश गरेको छ । नेपाली समय अनुसार आज सम्पन्न समूह ‘जे’ को रोमाञ्चक खेलमा अर्जेन्टिनाले युरोपेली प्रतिद्वन्द्वी अष्ट्रियालाई २(० गोलअन्तरले पराजित गर्दै अन्तिम १६ मा आफ्नो स्थान सुरक्षित गरेको हो ।

अमेरिकाको डालासस्थित स्टेडियममा भएको उक्त खेलमा अर्जेन्टिनाले सुरुदेखि नै खेललाई आफ्नो नियन्त्रणमा राखेको थियो । खेलको ३८औँ मिनेटमा कप्तान लियोनल मेस्सीले आकर्षक गोल गर्दै अर्जेन्टिनालाई सुरुवाती अग्रता दिलाएका थिए । त्यसपछि पहिलो हाफमा थप गोल हुन सकेन। खेलको दोस्रो हाफमा अष्ट्रियाले बराबरी गर्ने केही प्रयास गरे पनि अर्जेन्टिनी रक्षापङ्क्तिले त्यसलाई असफल तुल्याइदियो । खेलको दोस्रो हाफको अतिरिक्त समय अर्थात् इन्जुरी समयमा मेस्सीले व्यक्तिगत दोस्रो गोल गरेपछि अर्जेन्टिनाको जित सुनिश्चित भएको थियो ।

यो खेल मेस्सी र विश्व फुटबल इतिहासकै लागि ऐतिहासिक बनेको छ । अष्ट्रियाविरुद्धको दुई गोलसँगै ३९ वर्षीय मेस्सीले विश्वकप इतिहासमा आफ्नो कुल गोल सङ्ख्या १८ पुर्‍याएका छन् ।