गुरुङ र किलो १ को शङ्कास्पद कुराकानी !

राष्ट्रिय स्वतन्त्र पार्टी (रास्वपा)का नवनिर्वाचित सांसद सुधन गुरुङले जेनजी आन्दोलनको चरम दिन भदौ २४ गते काठमाडौँका उपत्यका (किलो १) का तत्कालीन प्रहरी प्रमुख एसएसपी विश्वराज अधिकारीसँग पटक–पटक टेलिफोन संवाद गरेको तथ्य सार्वजनिक भएको छ।।

गौरीबहादुर कार्की नेतृत्वको जाँचबुझ आयोगको प्रतिवेदनमा समावेश ‘कल डिटेल रेकर्ड’ (सीडीआर) विश्लेषणअनुसार दुवैबीच उक्त दिन दुई पटक सम्पर्क भएको देखिएको छ। प्रतिवेदनले एसएसपी अधिकारीको मोबाइल नम्बर ९८५१२८०३५५ र गुरुङको ९८०१०६६१११ बीच संवाद भएको उल्लेख गरेको छ।

सुरक्षा स्रोतहरूको विश्लेषणअनुसार डिस्कर्ड प्लेटफर्ममा सञ्चालन भएका ‘युथ एगेन्स्ट करप्सन’ र ‘युवा हब’ नामक सर्भरहरू आन्दोलनका क्रममा सक्रिय रहेका थिए। ती माध्यमबाट नेताहरूको घर, पार्टी कार्यालय, सरकारी संरचना तथा निजी प्रतिष्ठानमा आक्रमण गर्ने योजनाहरू बनाइएको दाबी गरिएको छ। यही सन्दर्भमा आन्दोलनकारीलाई सक्रिय बनाउने र सुरक्षा संयन्त्रलाई अन्यत्र व्यस्त राख्ने रणनीतिअन्तर्गत प्रहरीसँग सम्पर्क गरिएको हुनसक्ने अनुमानसमेत गरिएको छ।

३८ वर्षीय गुरुङ भदौ २३ को प्रदर्शनका औपचारिक आयोजक नभए पनि ‘हामी नेपाल’ नामक गैरसरकारी संस्थाका संस्थापक अध्यक्षका रूपमा माइतीघर क्षेत्रमा प्रदर्शनकारीलाई पानी वितरण गर्दै देखिएका थिए। तर, आन्दोलन क्रमशः उग्र बन्दै सत्ताविरुद्धको स्वरमा परिणत भएपछि उनले आफूलाई जेनजी आन्दोलनको अगुवा रूपमा प्रस्तुत गरेका थिए।

यद्यपि, भदौ २४ गते भएको हिंसात्मक घटनाको जिम्मेवारी उनले औपचारिक रूपमा लिएका छैनन्। प्रतिवेदनले उनी र प्रहरी प्रमुखबीचको संवादको उद्देश्यबारे स्पष्ट निष्कर्ष निकालेको छैन।