काठमाडौँ । नेपाली कम्युनिष्ट पार्टी नेकपाले पार्टी अनुशासन उल्लंघन गरेको ठहर गर्दै सात जना नेता तथा कार्यकर्तालाई संगठनबाट हटाएको छ । पार्टीको आधिकारिक निर्णयलाई चुनौती दिँदै उम्मेदवारी दिएको तथा त्यस्ता उम्मेदवारलाई साथ दिएको आरोपमा उनीहरूलाई निस्कासन गरिएको हो ।

आगामी फागुन २१ गते तय भएको आम निर्वाचनका क्रममा पार्टीले तोकेको उम्मेदवार रहेको निर्वाचन क्षेत्रमा स्वतन्त्र वा फरक रूपमा उम्मेदवारी दर्ता गराउने, साथै त्यस्ता उम्मेदवारका प्रस्तावक, समर्थक वा प्रचारक बनेका व्यक्तिलाई पार्टी विधानअनुसार कारबाही गरिएको पार्टीले जनाएको छ ।

पार्टी विधानको दफा १०६ बमोजिम गरिएको अनुशासनात्मक कारबाहीअन्तर्गत निष्कासित हुनेहरूमा सिन्धुलीका हरिबोल गजुरेल र महेश्वर दाहाल, दाङ निर्वाचन क्षेत्र नम्बर ४ का कुलप्रसाद केसी, उदयपुरका मेजर राई तथा सिरहाका धर्मनाथ साह, राजकुमारी साह र जिवछ साह रहेका छन् ।

पार्टी सह–संयोजक माधवकुमार नेपाल र संयोजक पुष्पकमल दाहाल ‘प्रचण्ड’द्वारा संयुक्त रूपमा जारी विज्ञप्तिमा पार्टीको निर्णय र निर्देशनविपरीत गरिने कुनै पनि गतिविधि स्वीकार्य नहुने स्पष्ट पारिएको छ। साथै, संगठनात्मक एकता र अनुशासनलाई कमजोर पार्ने कार्यप्रति पार्टी कडाइका साथ उभिने सन्देशसमेत दिइएको छ।