काठमाडौँ । नेपाल राष्ट्र बैंकले ५ लाख रुपैयाँभन्दा बढीको चेक साटेर नगद झिक्न नपाइने व्यवस्था लागू गरेको छ । केन्द्रीय बैंकले ५ लाखभन्दा माथिको चेक जारी गर्दा अनिवार्य रूपमा एकाउन्ट पेयी हुनुपर्ने व्यवस्था गरेको हो । यसअघि १० लाखसम्म रहेको नगद कारोबारको सीमा घटाएर ५ लाखमा झारिएको छ । सरकारले सम्पत्ति शुद्धीकरण न्यूनीकरण गर्ने उद्देश्यले नगद कारोबारको सीमा घटाएको जनाएको छ ।

सरकारको निर्णय नेपाल राजपत्रमा प्रकाशित भइसकेको छ । सोही निर्णयअनुसार केन्द्रीय बैंकले चेकबाट प्रति पटक झिक्न सकिने नगद ५ लाखमा सीमित गरेको हो । ५ लाखभन्दा बढी रकम भने सम्बन्धित व्यक्तिको खातामै जम्मा गर्नुपर्ने व्यवस्था गरिएको छ । हरेक कारोबार नगदमा गर्दा ५ लाखभन्दा कम हुनुपर्नेछ । ५ लाखभन्दा बढीको कारोबार भने एकाउन्ट पेयी चेकमार्फत गर्नुपर्नेछ ।

तर, यस व्यवस्थाले सामाजिक कार्य वा व्यापारमार्फत नगद सङ्कलन गर्नेलाई असर नगर्ने बताइएको छ । फर्म, कम्पनी, संस्था वा कार्यालयको नाममा खिचिएका चेकको भुक्तानी पनि एकाउन्ट पेयीमै गर्नुपर्नेछ । तर, कुनै निक्षेपकर्ता वा बचतकर्ताले विशेष कारणसहित नगद भुक्तानीका लागि निवेदन दिएमा अपवाद लागू हुन सक्नेछ ।