काठमाडौँ— नाबालिकालाई जबर्जस्ती यौनशोषणको कार्यमा लगाउने कसुरमा संलग्न भएको आरोपमा काठमाडौँ उपत्यकाका विभिन्न स्थानबाट पाँच जना पक्राउ परेका छन्। काठमाडौँ उपत्यकामा रहेका विभिन्न डान्सबार, क्लब, खाजाघर, स्पा सेन्टर तथा होटेलजस्ता स्थानमा नाबालिकालाई आर्थिक प्रलोभनमा पारेर यौनशोषण गरिएको विशेष सूचनाका आधारमा प्रहरीले कारबाही गरेको हो। काठमाडौँ जिल्ला अदालतबाट अनुमति लिई गरिएको विशेष अपरेशनका क्रममा विभिन्न स्थानबाट प्रतिवादीहरू पक्राउ परेका हुन्।

प्रहरीका अनुसार काठमाडौँ महानगरपालिका–२६ स्थित गोल्डेन स्पा, काठमाडौँ महानगरपालिका–७ चाबहिलस्थित फायर लाउञ्ज एन्ड क्लब, काठमाडौँ महानगरपालिका–३ ठमेलस्थित लस्सी झरना एन्ड क्लब, काठमाडौँ महानगरपालिका–२६ स्थित मिठास मिष्ठान्ना खाजाघर तथा काठमाडौँ महानगरपालिका–२६ स्थित खाजाघरमा छापा मारेर नाबालिकाहरूको उद्धार गरिएको थियो।

उद्धार गरिएका नाबालिकालाई सुरक्षित आवासका लागि विभिन्न संरक्षण केन्द्रमा पठाइएको प्रहरीले जनाएको छ। पीडितका तर्फबाट आवश्यक कारबाहीका लागि उजुरी दर्ता भइसकेको र पक्राउ परेका प्रतिवादीविरुद्ध विभिन्न मितिमा मुद्दा दर्ता गरी काठमाडौँ जिल्ला अदालतबाट थप अनुसन्धान कार्य अघि बढाइएको प्रहरीले जानकारी दिएको छ।