काठमाडौँ । नेपाली कांग्रेसका सभापति शेरबहादुर देउवा सिंगापुरमा उपचार सकेर स्वेदश फर्किएका छन् । कात्तिक १० गते सिंगापुर गएका देउवा दम्पती उपचार सकेर शुक्रबार राति काठमाडौँ आइपुगेका हुन् । गत भदौ २४ गतेको जेनजी आन्दोलनको क्रममा सभापति देउवा र उनकी श्रीमती तत्कालीन परराष्ट्र मन्त्री आरजु राणा आफ्नै निवास बूढानीलकण्ठमा आन्दोलनकारीको आक्रमणमा परेका थिए ।

आक्रमणबाट गम्भीर घाइते भएका देउवाको टाउकाको पछाडि भागमा चोट लागेको थियो। त्यहाँ १२ वटा टाँका लगाएको कांग्रेस नेताहरूले बताएका थिए।
पार्टीमा उपसभापति पूर्णबहादुर खड्कालाई कार्यवाहक दिएर देउवा उपचारका लागि सिंगापुर उडेका थिए। यता, देउवा सिंगापुर जानुअघि नै सुरु भएको नेपाली कांग्रेस केन्द्रीय कार्य समितिको बैठक जारी छ । शुक्रबार बसेको कांग्रेस केन्द्रीय कार्य समितिको बैठकको अब मंसिर १ गते बस्दैछ ।
आज कात्तिक २९ शनिबार दिउँसो २ः०० बजेका लागि तोकिएको बैठक सारेर मंसिर १ गतेका लागि तय गरिएको हो ।