मन जित्यौं तर मत जित्न सकेनौं : कुलमान घिसिङ

काठमाडौँ । उज्यालो नेपाल पार्टीका अध्यक्ष कुलमान घिसिङले प्रतिनिधिसभा सदस्य निर्वाचनमा जनताको मन जिते पनि मतमा भने सफलता हासिल गर्न नसकेको बताएका छन् । सामाजिक सञ्जाल फेसबुकमा स्टाटस लेख्दै उनले कामबाट जनताको विश्वास जिते पनि यस पटक मत परिणाम आफ्नो पक्षमा आउन नसकेको उल्लेख गरेका हुन् ।

काम र परिणाम दिने प्रतिबद्धतासहित चुनावमा होमिएको भन्दै छोटो समयमै जनअभिमतमार्फत प्राप्त माया, विश्वास र सद्भाव आफूहरूका लागि ठूलो ऊर्जा र मार्गदर्शन बनेको उनले बताएका छन् ।

घिसिङले भ्रष्टाचारविरुद्ध र सुशासनको मागसहित उठेको ‘जेनजी विद्रोह’पछि सम्पन्न चुनावमा नयाँ शक्तिका रूपमा उज्यालो नेपाल पार्टी उदाएको उल्लेख गरेका छन्। पार्टीका उम्मेदवारलाई मतदान गर्ने मतदाता, समर्थक तथा शुभेच्छुकप्रति उनले आभार व्यक्त गरेका छन्।