काठमाडौँ । नेपाल प्रहरीमा उपल्लो तहमा बढुवाका लागि अनिवार्य बनाइएको मास्टर्स अफ पुलिस साइन्स (एमपीएस) अन्तर्गतको स्टाफ कलेज प्रवेश परीक्षामा १६ जना प्रहरी नायब उपरीक्षक (डीएसपी) मात्र छनोट भएका छन्। यो एमपीएसका लागि छनोट भएको डीएसपीको दोस्रो टोली हो । गत वर्षदेखि प्रहरीका उपल्ला तहमा बढुवा हुने अधिकारीका लागि एमपीएस कोर्स लागू गरिएको हो। २०७० सालमा प्रहरी निरीक्षक (इन्स्पेक्टर)मा भर्ना भई हाल डीएसपी बनेकाहरूले यस वर्ष स्टाफ कलेजको प्रवेश परीक्षा दिएका थिए। कुल ८९ जना डीएसपी सहभागी भएको परीक्षामा १६ जना मात्रै उत्तीर्ण भएका हुन्।

उत्तीर्ण भएकामध्ये डीएसपी विकास बम पहिलो, हरिप्रसाद पौडेल दोस्रो र प्रवीण कार्की तेस्रो स्थानमा रहेका छन्। उत्तीर्ण डीएसपीहरूले सन् २०२६ का लागि स्टाफ कलेज अध्ययन गर्नेछन्। यो कोर्स पास नगर्ने प्रहरी अधिकारी एसएसपीभन्दा माथिको बढुवाका लागि अयोग्य हुने व्यवस्था गरिएको छ। त्रिभुवन विश्वविद्यालयले मंसिर २२, २३ र २४ गते एमपीएसका लागि प्रवेश परीक्षा सञ्चालन गरेको थियो। परीक्षाफल आइतबार सार्वजनिक गरिएको हो।

यता, केही डीएसपीहरूले प्रहरीमा स्टाफ कलेज कोर्स लागू गर्नु अनुचित भएको दाबी गर्दै सर्वोच्च अदालतमा रिट दायर गरेका छन्। उक्त मुद्दा हाल विचाराधीन अवस्थामा रहेको छ।