काठमाडौँ । नेपालमा आयल निगमले बजारमा खाना पकाउने एलपी ग्यासको आपूर्ति नियमित भइसकेकाले अभाव नभएको जनाएको छ । भारतको बरौनी रिफाइन केन्द्र मर्मत गर्न एक हप्ता बन्द भई टाढा रहेको पारादीप रिफाइनरी केन्द्रबाट ग्यास आपूर्ति गर्दा समय लाग्ने हुँदा कम भई सामान्य अभाव रहेकामा बरौनीबाट आइतबारदेखि नै ग्यास ढुवानी हुन थालेकाले अभाव नहुने निगमले जनाएको छ ।

निगमका प्रवक्ता मनोजकुमार ठाकुरले ग्यासको आयात नियमित भइसकेकाले अभाव नहुने जानकारी दिए। उनले सोमबार मात्र बरौनी रिफाइनरी केन्द्रबाट ५० बुलेट लोड भएर हिँडिसकेकाले पनि तत्काल ग्यासको समस्या सामाधान हुने जानकारी दिए ।

सामान्य अवस्थामा बजारमा दैनिक ७० देखि ७५ बुलेट ग्यास खपत हुने गर्छ । बरौनी रिफाइनरीबाट तीन दिनमा नेपाल ग्यास आयात हुने गर्छ । एक साता बरौनी रिफाइनरी मर्मत भई बन्द हुँदा ग्यासको आयात कम हुँदा बजारमा सामान्य अभाव भएको निगमले जनाएको छ ।