माओवादी केन्द्र र एकीकृत समाजवादी बीचको एकता अन्तिम चरणमा

काठमाडौँ । वामपन्थी घटकबीच एकता गर्ने प्रयास तीव्र भइरहेका बेला नेकपा माओवादी केन्द्र र नेकपा एकीकृत समाजवादी बीच पार्टी एकीकरणको प्रारूपमा सहमति नजिक पुगेको छ । पार्टीको नाम, नीति तथा नेतृत्वबारे दुवै पक्षबीच करिब सहमति बनेको एकीकृत समाजवादीका एक नेताले जानकारी दिए ।

उनका अनुसार, चुनाव चिह्न र सङ्गठनात्मक संरचनाबारे भने अझै छलफल जारी छ । एकीकृत समाजवादीले कात्तिक १२ देखि १४ गतेसम्म केन्द्रीय समिति बैठक बोलाएको छ, जसले एकता प्रस्तावलाई अन्तिम रूप दिने तयारी गरेको छ ।

सुरुवाती चरणमा नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीसहित चार कम्युनिस्ट घटकबीच एकता गर्ने पहल भए पनि विप्लव समूह पछि हटिसकेको छ। अहिले माओवादी केन्द्र, एकीकृत समाजवादी र महिन्द्र राय यादवको नेपाल समाजवादी पार्टीबीच एकताको वार्ता निष्कर्षतर्फ बढेको बताइएको छ। एक पदाधिकारीका अनुसार, कात्तिक मसान्तभित्रै एकताको टुङ्गो लाग्ने सम्भावना उच्च छ । प्रतिनिधि सभा निर्वाचन फागुन २१ गते तोकिएपछि निर्वाचन आयोगमा कात्तिक ३० भित्र दर्ता हुनुपर्ने संवैधानिक व्यवस्थाले पनि यी दलहरूलाई एकताको दिशातर्फ चाँडो बढ्न प्रेरित गरेको हो।