निजी क्षेत्रलाई दलालको ट्याग लगाउनु हुँदैन : प्रदीप पौडेल

काठमाडौँ । नेपाली कांग्रेसका महामन्त्री प्रदीप पौडेलले निजी क्षेत्रलाई गाली गरेर ‘दलाल’को ट्याग लगाउन नहुने बताएका छन् । नेपाल आर्थिक पत्रकार सङ्घले आइतबार काठमाडौँमा आयोजित ‘दलका घोषणापत्रमा आर्थिक एजेन्डा’ विषयक कार्यक्रममा बोल्दै उनले भने, कानुनको दायरामा बसेर नाफा कमाउनेलाई हामीले दलाल भन्न नहुने हो।

पौडेलले थपे, व्यवसायीहरूले ठुलो मेहनतले पुँजी निर्माण गर्छन् र त्यसबाट रोजगारी सिर्जना हुन्छ, त्यसैले हामीले निजी क्षेत्रलाई सहयोग गर्नुपर्छ। उनले राजनीतिक दलहरूको घोषणापत्रमा आर्थिक दृष्टिकोण स्पष्ट हुनुपर्ने र देशको समृद्धिका लागि नीति निर्माणमा जिम्मेवारी लिनुपर्ने आवश्यकता रहेको बताए ।