काठमाडौँ । नेपालमा हुने तय भएर स्थगित भएको आईसीसी विश्वकप लिग–२ अन्तर्गतका खेल आगामी वैशाख १२ देखि २२ गते अप्रिल २५ देखि मे ५ सम्म काठमाडौंमा सञ्चालन हुने भएका छन् । त्यसलगत्तै वैशाख २९ गतेदेखि जेठ ८ गतेसम्म अर्को शृङ्खला पनि आयोजना गरिने तालिका सार्वजनिक गरिएको छ ।

नेपाल क्रिकेट संघ क्यानले मंगलबार नयाँ मिति घोषणा गर्दै स्थगित रहेको नेपाल, यूएई र ओमान सम्मिलित शृङ्खला वैशाखमा सञ्चालन हुने जानकारी दिएको हो । तालिकाअनुसार नेपाल र यूएईबीच पहिलो खेल वैशाख १२ गते हुनेछ भने दोस्रो खेल वैशाख १६ गते ओमानसँग हुनेछ । एक टोलीसँग दुई–दुई खेल खेल्ने तालिकाअनुसार नेपालले तेस्रो खेल वैशाख १८ गते यूएईसँग खेल्नेछ भने चौथो खेल वैशाख २२ गते ओमानसँग हुनेछ ।

यसअघि नेपाल, ओमान र यूएईबीचको शृङ्खला गत फागुन २६ देखि चैत ६ गतेसम्म कीर्तिपुरमा सञ्चालन हुने तय थियो । तर मध्यपूर्व क्षेत्रमा देखिएको तनावपूर्ण अवस्थालाई ध्यानमा राख्दै क्यानले विश्वकप लिग–२ का खेल अर्को सूचना जारी नभएसम्मका लागि स्थगित गरेको थियो ।