कोहलपुर-सुर्खेत १३२ केभी विद्युत प्रसारण लाइन परीक्षण

सुर्खेत । बहुप्रतिक्षित कोहलपुर सुर्खेत १३२ केभी विद्युत प्रसारण लाइन परीक्षण गरिएको छ । आयोजना निर्माण सम्पन्न भएसंगै शुक्रबार उक्त लाइन परीक्षण गरिएको हो । १३२ केभी प्रशारण लाइनको निर्माण सम्पन्न भएसँगै कर्णालीबासीले भोग्दै आएको विद्युत समस्या समाधान हुने अपेक्षा गरिएको छ ।

सात बर्षअघि निर्माण थालिएको कोहलपुर-सुर्खेत १३२ केभी विद्युत प्रसारण आयोजनाको परीक्षणसँगै कर्णालीको विद्युत् आपूर्तिमा हुने अनियमितता तथा लो भोल्टेजको समस्या समाधान हुने अपेक्षा स्थानीयको छ । शुक्रबार प्रसारण लाईनको परीक्षण थालिएको आयोजना प्रमुख रवी चौधरीले बताए । उनका अनुसार छिटफुट ठाउँमा बाहेक कतै समस्या देखिएको छैन ।

परीक्षण सफल भए लगत्तै नियमित विद्युत प्रशारण गरिने उनले बताए । ‘शुक्रबार कोहलपुर-सुर्खेत १३२ प्रशारण लाईनको परिक्षण गरिएको छ’ उनले भने, ‘कहिँकतै विद्युत चुहावटको समस्या भए पनि अन्य सबै सफल भइरहेको छ ।’ बाँकेको कोहलपुरस्थित सबस्टेशनदेखि वीरेन्द्रनगरको सुब्बाकुनामा निर्माण गरिएको सबस्टेशनमा डबल सर्किट प्रसारण लाइनबाट १३२ किलोभोल्ट क्षमताको विद्युत प्रवाह गरेर परीक्षण गरिएको उनले जानकारी दिए ।