जेष्ठ सदस्य केसीले नवनिर्वाचित सांसदलाई शपथ खुवाउने

काठमाडौँ । नेपाली कांग्रेसका समानुपातिक सांसद अर्जुननरसिंह केसीले नवनिर्वाचित अन्य सांसदहरूलाई शपथ खुवाउने भएका छन् । ७८ वर्षीय केसीले राष्ट्रपति रामचन्द्र पौडेलबाट चैत १२ गते दिउँसो शपथ ग्रहण गरेपछि अन्य सदस्यलाई शपथ गराउने कार्यक्रम रहेको छ ।

निर्वाचन आयोगले सार्वजनिक गरेको प्रत्यक्ष र समानुपातिक दुवैतर्फको अन्तिम सूचीअनुसार प्रतिनिधिसभामा केसी सबैभन्दा जेष्ठ सदस्य हुन् ।

संवैधानिक व्यवस्थाअनुसार सभामुख र उपसभामुख चयन नभएसम्म जेष्ठ सदस्यले अन्य सांसदलाई शपथ गराउने र प्रतिनिधिसभाको पहिलो बैठकको अध्यक्षता गर्ने प्रचलन रहेको छ ।