काठमाडौँ । रामचन्द्र पौडेलले महाशिवरात्रिको अवसर पारेर पशुपतिनाथ मन्दिर दर्शनका लागि आएका साधुसन्तलाई प्रदान गरिने सामग्रीको औपचारिक संकल्प गरेका छन् । हरेक वर्ष फाल्गुन कृष्ण त्रयोदशीमा मनाइने महाशिवरात्रि अघि एकादशीको बिहान राष्ट्राध्यक्षबाट साधुको बिदाइमा दिइने सामग्रीको संकल्प गर्ने परम्परा रहँदै आएको छ ।

गुठी संस्थानका प्रवक्ता तथा कानुन अधिकृत जनक पोखरेलका अनुसार यस वर्ष पनि मूल साधुलाई लोटा, चम्मर, घण्टी, राडीको एक सेटसहित दक्षिणा जोडेर २१ प्रकारका सामग्री प्रदान गरिनेछ । यी सामग्री महाशिवरात्रिमा विश्वका विभिन्न स्थानबाट पशुपति आउने साधुसन्तलाई बिदाइका क्रममा हस्तान्तरण गरिन्छ ।