सहुलियतपूर्ण कर्जाको ब्याज अनुदान पुनः सुरु, राष्ट्र बैंकद्वारा १० अर्ब ५८ करोड भुक्तानी

काठमाडौँ । नेपाल राष्ट्र बैंकले ५० वटा बैंक तथा वित्तीय संस्थालाई सहुलियतपूर्ण कर्जाको ब्याज अनुदान बापत १० अर्ब ५८ करोड रुपैयाँ भुक्तानी गरेको छ । सहुलियतपूर्ण कर्जाको दुरुपयोग भएको भन्दै रोकिएको अनुदान एक वर्षपछि सरकारले पुनः भुक्तानी सुरु गरेको हो । नयाँ सरकार गठनपछि अर्थ मन्त्रालयले असोज ५ गते ९ अर्ब ८० करोड रुपैयाँ निकासा गरेको थियो । राष्ट्र बैंकका अनुसार अर्थ मन्त्रालयबाट रकम आएपछि डेटा भेरिफिकेसनको प्रक्रिया सकिएपछि बुधबार अनुदानको भुक्तानी गरिएको हो ।

सरकारले युवा स्वरोजगार, कृषि, शिक्षा, पर्यटन, विपन्न वर्गलगायतका विभिन्न क्षेत्रमा सहुलियतपूर्ण कर्जा प्रदान गर्दै आएको छ । यस कर्जामा लाग्ने ब्याजको एक हिस्सा अनुदानस्वरूप सरकारले बेहोर्ने व्यवस्था रहेको छ ।