पुनर्गठनको एजेन्डा रवि लामिछानेको विकल्प होइन: तोसिमा कार्की

काठमाडौँ । राष्ट्रिय स्वतन्त्र पार्टी रास्वपाकी नेतृ डा तोसिमा कार्कीले पार्टी सभापति रवि लामिछानेको विकल्प खोज्ने उद्देश्यले पुनर्गठनको एजेन्डा अघि सारेको भन्ने टिप्पणीको खण्डन गरेकी छन् । शनिबार सामाजिक सञ्जाल फेसबुकमार्फत भिडियो सन्देश जारी गर्दै उनले पुनर्गठनको कुरा व्यक्ति विरोधका लागि नभई पार्टीलाई सुदृढ बनाउन उठाएको बताइन् । कृपया, रवि लामिछानेको विकल्पका लागि यस्तो भनिएको हो भन्ने कसैले नठान्नुस्, उनले भनिन्।

डा। कार्कीले पार्टी हालको यथास्थितिमै रहिरहेमा ठूलो राजनीतिक शक्ति बन्न नसक्ने दाबी पनि गरिन् । उनले भनिन्, रास्वपाले ठूलो हृदय र साझा प्लेटफर्म लिएर अघि बढ्न जरुरी छ। उनले पार्टी भित्रका सहकर्मीहरूलाई निरन्तर आरोप र व्यक्तिगत आक्रमण नगर्न आग्रह गर्दै भनिन्,म आफ्नो पेसा छाडेर रास्वपालाई अपनाएकी हुँ। मैले उठाएको पुनर्गठनको एजेन्डा कुनै व्यक्तिविरुद्ध होइन, पार्टी मजबुतका लागि हो।