काठमाडौँ । नेकपा माओवादी केन्द्रका संयोजक पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधवकुमार नेपालबीच एकता सहमतिपछि भेट भएको छ । नेपाललाई भेट्न माओवादीका वरिष्ठ उपाध्यक्ष नारायणकाजी श्रेष्ठलाई लिएर ‘प्रचण्ड’ आलोकनगरस्थित एकीकृत समाजवादीको कार्यालय पुगेका हुन् ।

माओवादी र नेकपा एससहित ८ पार्टीबीच एकता सहमति भइसकेको छ । एकीकृत पार्टीको चुनाव चिह्न भने तारा राख्ने सहमति भइसकेको छ। यद्यपि, नामबारे अझै निष्कर्षमा पुगेका छैनन् । पार्टी एकताको निर्णयसँग एकीकृत समाजवादी विभाजित भइसकेको छ भने नेकपा माओवादी पनि फुटको संघारमा रहेको छ । भेटमा एकता सभादेखि आगामी रणनीतिबारे छलफल भएको बताइएको छ। एकीकृत पार्टीको संयोजकमा ‘प्रचण्ड र सहसंयोजकमा माधव नेपाल रहने सहमति छ ।