एक सय नौ किलो गाँजा प्रहरीको नियन्त्रणमा

काठमाडौँ । महोत्तरीको रामगोपालपुर नगरपालिका–८ स्थित सहसौला चोक नजिकबाट प्रहरीले भारी परिमाणमा गाँजा र एक भारतीय कार नियन्त्रणमा लिएको छ । जिल्ला प्रहरी कार्यालय महोत्तरीका प्रमुख प्रहरी उपरीक्षक हेरम्ब शर्माका अनुसार, २० वटा पोकामा प्याक गरिएको १०९ किलोग्राम गाँजा भारततर्फ तस्करी गर्न लागिएको अवस्थामा बरामद गरिएको हो ।

गएराति ११ बजेतिर पूर्वपश्चिम लोकमार्ग हुँदै लागुऔषध ओसारपसार भइरहेको गोप्य सूचनाका आधारमा लागुऔषध ब्युरो र इलाका प्रहरी कार्यालय रामगोपालपुरको टोलीले छापा मारेको थियो । प्रहरीले डिएल १ सीओ ५८६९ नम्बरको भारतीय कार नियन्त्रणमा लिए पनि चालक भने फरार भएका छन्।

बरामद गरिएको गाँजा र कारलाई हाल प्रहरी नियन्त्रणमा राखेर थप कानुनी कारबाही र फरार चालकको खोजी कार्य अगाडि बढाइएको प्रहरी उपरीक्षक शर्माले जानकारी दिए ।