ओलीको दाबी : भदौ २४ को घटना योजनाबद्ध, आफू लक्षित आक्रमणको प्रयास भयो

काठमाडौँ । पूर्वप्रधानमन्त्री केपी शर्मा ओलीले भदौ २४ गते भएको घटना योजनाबद्ध भएको दाबी गरेका छन् । भदौ २३ र २४ को घटनाबारे छानबिन गरिरहेको गौरीबहादुर कार्की नेतृत्वको आयोगलाई दिएको लिखित बयानमा ओलीले कम समयमा यत्रो क्षति हुनु संयोग नभई नियोजित भएको बताएका हुन् ।

ओलीले २४ भदौको अवस्था नियन्त्रणमा लिन नेपाली सेना परिचालन गर्न चाहेपनि सम्भव नभएको उल्लेख गरेका छन्। उनले सो दिन बालुवाटारमै प्रवेश गरेर आफूलाई लक्षित आक्रमणको प्रयास भएको र ज्यानसमेत जोखिममा परेको दाबी गरेका छन् ।

उनका अनुसार आन्दोलनमा आन्तरिक मात्र नभई बाह्य शक्तिको समेत घुसपैठ देखिन्छ। संसद् भवन, सर्वोच्च अदालत, प्रधानमन्त्री तथा राष्ट्रपति निवाससहित निजी सम्पत्तिमा भएको क्षति योजनाअनुसार भएको ओलीको निष्कर्ष छ। साथै, सुरक्षा निकायबाट अपेक्षित सहयोग नपाएको गुनासो पनि उनले गरेका छन्।

ओलीले आयोग संयोजक कार्कीले घटनाअघि नै सामाजिक सञ्जालमा धारणा सार्वजनिक गरेकाले निष्पक्ष प्रतिवेदन आउनेमा शंका रहेको अडान पुनः दोहोर्‍याएका छन्।

एक्सप्रेस

सम्बन्धित खबर

दमकमा रास्वपाको घरदैलो कार्यक्रम हुँदै, बालेन सहभागी नहुने