नेपालमा पनि बंगलादेशको जस्तै चुनावी परिणाम आउने ओलीको दाबी

झापा । नेकपा एमालेका अध्यक्ष केपी शर्मा ओली ले नेपालमा हुने आगामी निर्वाचनको परिणाम बंगलादेशको जस्तै आउने दाबी गरेका छन् । उनले बंगलादेशको निर्वाचनका विजेतालाई बधाई तथा शुभकामना पनि व्यक्त गरेका छन् । काठमाडौंबाट आफ्नो निर्वाचन क्षेत्र झापा–५ जाने क्रममा भद्रपुर विमानस्थलमा सञ्चारकर्मीसँग कुराकानी गर्दै ओलीले अहिले देखिएको राजनीतिक वातावरणले नेपालमा पनि बंगलादेशकै चुनावी प्रवृत्ति दोहोरिन सक्ने संकेत गरेको बताए ।

सामाजिक सञ्जालमा चर्चित व्यक्तिहरू पराजित भएको तथा आन्दोलनबाट उदाएका दलहरू कम सिटमा सीमित भएको विषयमा सोधिएको प्रश्नमा उनले यस्तो प्रतिक्रिया दिएका हुन् ।

उनले देशमा अझै चुनावका लागि पूर्ण भरोसायोग्य वातावरण नबनेको दोहोर्‍याए। पार्टी चुनावी तयारीमा सक्रिय भए पनि राजनीतिक स्थिरता र विश्वस्त माहोल निर्माण हुन बाँकी रहेको उनको भनाइ छ ।