काठमाडौँ । नेपाल क्रिकेट संघ क्यानले सन् २०२६ का लागि राष्ट्रिय क्रिकेट खेलाडीहरूको नयाँ केन्द्रीय सम्झौता सेन्ट्रल कन्ट्रयाक्ट र पारिश्रमिकको नयाँ संरचना सार्वजनिक गरेको छ । सन् २०२५,०२६ को घरेलु तथा अन्तर्राष्ट्रिय प्रतियोगिताहरूमा खेलाडीहरूको स्तर र प्रदर्शनका आधारमा यो नयाँ वर्गीकरण तय गरिएको क्यानका प्रवक्ता छुम्बी लामाले जानकारी दिएका छन् । यो पटक सम्झौतामा समेटिने खेलाडीहरूको संख्या बढाउनुका साथै सबै श्रेणीमा मासिक ५ हजार रुपैयाँ पारिश्रमिक वृद्धि गरिएको छ ।

यस वर्ष क्यानले कुल ६३ खेलाडी ३८ पुरुष र २५ महिलालाई विभिन्न श्रेणीमा विभाजन गरेको छ । क्रिकेट इतिहासमै पहिलो पटक पुरुषतर्फ ‘ए प्लस’ श्रेणीको विशेष व्यवस्था गरिएको छ, जसमा एकदिवसीय टोलीका कप्तान रोहितकुमार पौडेल, टी–२० आईका कप्तान दीपेन्द्रसिंह ऐरी र लेग स्पिनर सन्दीप लामिछाने मात्र समेटिएका छन् ।

‘ए प्लस’ मा परेका यी तीन खेलाडीले मासिक १ लाख २० हजार रुपैयाँ पारिश्रमिक पाउनेछन् । यस्तै, ‘ए’ श्रेणीमा रहेका कुशल भुर्तेल, सोमपाल कामी, करण केसी र आसिफ शेखले प्रतिमहिना १ लाख रुपैयाँ प्राप्त गर्नेछन् । ‘बी’ श्रेणीका खेलाडीलाई ७५ हजार र अधिकांश राष्ट्रिय ‘ए’ टोलीका सदस्यहरू रहेको ‘सी’ श्रेणीका खेलाडीलाई ५५ हजार मासिक तलब तोकिएको छ ।