भदौ २३ का घटनाको जिम्मेवार केपी ओली : ईश्वर पोखरेल

काठमाडौँ । नेकपा एमालेका नेता ईश्वर पोखरेलले भदौ २३ गतेको घटनाको मुख्य जिम्मेवार पार्टी अध्यक्ष केपी ओली नै भएको दाबी गरेका छन् । कार्की बैंक्वेटमा जारी आफ्नो प्यानलको धन्यवाद भेलालाई सम्बोधन गर्दै पोखरेलले भने, हामी विभाजन अस्वीकार गर्छौँ तर आत्मसमर्पण पनि मन्जुर छैन। उनले पार्टी अध्यक्ष ओलीको अभिव्यक्तिमाथि प्रश्न उठाउँदै थपे, म जे बोल्छु त्यही हो, एमाले सुन्दा पनि आङ सिरिङ हुन्छ । म भएन भने एमाले हुन्न यो के भन्ने हो।

भेलामा पोखरेल प्यानलबाट लडेका नेता र कार्यकर्ताहरूको सहभागिता रहेको थियो । प्यानलबाट जितेका उपाध्यक्ष गोकर्ण बिष्ट र उपमहासचिव योगेश भट्टराई पनि सहभागी भएका थिए । पूर्वराष्ट्रपति विद्या भण्डारीको समर्थनमा केपी ओलीसँग भिडेको पोखरेल समूहले अपेक्षित नतिजा नल्याएपछि आज आन्तरिक छलफलमा जुटेको जानकारी छ ।