विकास बजेट खर्च गर्न कर्णाली सरकार असफल, साढे १२ अर्ब रुपैयाँ फ्रिज

सुर्खेत । कर्णाली प्रदेश सरकारले चालु आर्थिक वर्षको बजेट समयमै खर्च गर्न नसक्दा साढे १२ अर्ब रुपैयाँभन्दा बढी बजेट फ्रिज भएको छ । कर्णाली प्रदेश लेखा नियन्त्रक कार्यालयका अनुसार कुल विनियोजित बजेटमध्ये चालु आर्थिक वर्षमा ६१.९७ प्रतिशत मात्र खर्च हुन सकेको हो ।

प्रदेशको कुल ३३ अर्ब १९ करोड ३६ लाख ५५ हजार रुपैयाँको बजेटमध्ये २० अर्ब ५७ करोड १२ लाख आठ हजार रुपैयाँ मात्र उपयोग भएको छ भने बाँकी १२ अर्ब ६२ करोड २४ लाख ४६ हजार ६२२ रुपैयाँ सरकारी कोषमै थन्किएर फ्रिज हुन पुगेको छ । बजेट विनियोजन र खर्चको विधागत अवस्था हेर्दा चालुतर्फ तुलनात्मक रूपमा बढी र पुँजीगत अर्थात् विकासतर्फ निकै कमजोर खर्च देखिएको छ ।