काठमाडौँ । इरानले अमेरिका र इजरायलसँग जारी द्वन्द्व ‘सधैंका लागि अन्त्य गर्ने’ उद्देश्यसहित शान्ति प्रस्ताव अघि सारेको छ । इरानको सरकारी समाचार एजेन्सी आईआरएनएका अनुसार उक्त प्रस्ताव पाकिस्तानमार्फत् पठाइएको हो । बीबीसीका अनुसार अमेरिकाबाट आएको १५ बुँदे प्रस्तावको करिब दुई सातासम्म समीक्षा गरेपछि इरानी नेतृत्वले आफ्नो धारणा तयार पार्दै नयाँ शान्ति प्रस्ताव अघि बढाएको हो ।

यसअघि अमेरिकी राष्ट्रपति डोनाल्ड ट्रम्पले समुद्री मार्ग स्ट्रेट अफ होर्मुज खुला गर्न इरानलाई मंगलबारसम्मको समय दिएका थिए। उनले उक्त मार्ग नखुलाए इरानका विद्युत् केन्द्र र पुलहरूलाई निशाना बनाउने चेतावनी दिएका थिए। समयसीमा सकिनु एक दिनअघि इरानले युद्ध अन्त्यका लागि शान्ति सन्देश सार्वजनिक गरेको हो ।