इरानद्वारा दुबईको विशाल तेलभण्डार केन्द्रमा ड्रोन हमला

इरान । इरानले संयुक्त अरब इमिरेट्स यूएईको फुजाइरा बन्दरगाहमा शनिबार ड्रोन हमला गरेको छ । यो हमला अमेरिकाले इरानको खार्ग द्वीपमा भीषण आक्रमण गरेलगत्तै भएको हो । यूएईका अधिकारीहरूले फुजाइरामा लागेको आगो निभाउने प्रयास जारी रहेको बताएका छन् । उनीहरूका अनुसार हवाई प्रतिरोध प्रणालीले नष्ट गरेको ड्रोन खस्दा आगलागी भएको हो ।

फुजाइरा बन्दरगाह यूएईका लागि अत्यन्त महत्वपूर्ण स्थान हो । यो मध्यपूर्वकै सबैभन्दा ठूलो तेल भण्डारण केन्द्रहरूमध्ये एक मानिन्छ । साथै, अन्तर्राष्ट्रिय पानीजहाजहरूलाई इन्धन आपूर्ति गर्ने प्रमुख केन्द्रका रूपमा पनि यसलाई हेरिन्छ ।

यो बन्दरगाह ओमानको खाडीमा अवस्थित छ । यहाँ पुग्नका लागि पानीजहाजहरूले जलक्षेत्रमा युद्ध सुरु भएको दुई सातायता लगभग बन्द रहेको हर्मुज स्ट्रेट पार गर्नुपर्दैन । ड्रोन हमलापछि सामाजिक सञ्जालमा देखिएका भिडियोहरूमा यूएईको पूर्वी तटमा रहेको उक्त पूर्वाधार परिसरबाट बाक्लो धुवाँ उठिरहेको देखिएको छ ।