परराष्ट्रले भन्यो : इरान नजानु, त्यहाँ रहेका तत्काल फर्किनु

काठमाडौँ । इरानमा विकसित पछिल्लो राजनीतिक तथा सुरक्षा परिस्थितिलाई ध्यानमा राख्दै नेपाल सरकारले आफ्ना नागरिकका लागि ट्राभल एड्भाइजरी जारी गरेको छ । परराष्ट्र मन्त्रालयले आइतबार सार्वजनिक गरेको सूचनामा अवस्था सामान्य नहुँदासम्म इरान यात्रा नगर्न तथा त्यहाँ रहेका नेपाली नागरिकलाई सकेसम्म चाँडो स्वदेश फर्किन अनुरोध गरिएको छ ।

मन्त्रालयका अनुसार हाल इरानमा जारी आन्दोलन, हिंसात्मक झडप र अनिश्चित अवस्थाले विदेशी नागरिकहरूको सुरक्षामा जोखिम बढाएको छ । यही कारणले नयाँ यात्रा योजना स्थगित गर्न र काम वा बसोबासका सिलसिलामा इरानमा रहेका नेपाली नागरिकलाई कुनै पनि माध्यमबाट छिटो देश छाड्न सुझाइएको हो ।