काठमाडौँ । नेपाली कांग्रेसका सभापति गगनकुमार थापाले आगामी पाँच वर्ष कांग्रेस नेतृत्वमा देश तीव्र रूपमा सञ्चालन हुने दाबी गरेका छन् । सर्लाही क्षेत्र नम्बर १ अन्तर्गत बैलबास बजारमा आयोजित चुनावी सभालाई सम्बोधन गर्दै उनले विवेक र सावधानीका साथ देश अघि बढाइने बताए ।

थापाले २०७४ पछिका अवधिमा कांग्रेस, एमाले, माओवादी केन्द्र र राष्ट्रिय स्वतन्त्र पार्टीलगायत दलहरू सरकारमा सहभागी हुँदा कमजोरी भएको स्वीकार गरे । विद्यमान ऐन–कानुनका कारण निजी क्षेत्र तथा विदेशी लगानीकर्तासमेत हच्किएको उल्लेख गर्दै कांग्रेस नेतृत्वको सरकार बनेपछि ती अवरोधहरू सुधार गरिने बताए । वर्तमान परिस्थितिमा कांग्रेस नै नयाँ सोच, जोस र जाँगर बोकेको पार्टी भएको दाबी गर्दै उनले मतदातासँग समर्थन मागे ।