चितवन । रसुवा बाढीका कारण नदीले बगाएर चितवनका विभिन्न स्थानमा पुर्‍याएका २ सय ३३ वटा शवमध्ये पहिचान हुन नसकेका २ सय २९ वटा शवलाई जमिनमुनि गाडेर व्यवस्थापन गर्ने निर्णय गरिएको छ ।

जिल्ला प्रशासन कार्यालय चितवनका अनुसार सङ्कलन गरिएका शवहरूमध्ये ४ वटाको मात्र पहिचान भएको र बाँकी शवहरू तीव्र रूपमा सड्न थालेकाले जिल्लामा महामारी फैलिने उच्च जोखिमलाई ध्यानमा राख्दै यस्तो बाध्यकारी निर्णय लिइएको हो ।

होल्डिङ सेन्टर, स्वास्थ्य संस्था तथा नदी तटीय क्षेत्रबाट सङ्कलित शव एवम् शवका अवशेषहरू कुहिन थालेपछि सङ्क्रमण र महामारी फैलिन सक्ने स्वास्थ्य विज्ञहरूको चेतावनीका आधारमा थप सड्न(गल्न नदिन सुरक्षित रूपमा व्यवस्थापन गर्न लागिएको हो ।