धुलिखेल-खावा सडक भोलिदेखि १० दिन रातको समयमा बन्द हुने

काठमाडौँ । अरनिको राजमार्गअन्तर्गतको धुलिखेल-खावा सडक खण्डमा आइतबारदेखि राति सवारी आवागमन बन्द हुने भएको छ । सडक स्तरोन्नतिका लागि साँझ ६ बजेबाट बिहान पाँच बजेसम्म सवारी आवागमन बन्द हुने भएको हो । आइतबारबाट १० दिनसम्म राति सवारी आवागमन रोक लगाइने डिभिजन सडक कार्यालय भक्तपुरले जनाएको छ ।

चैतभित्र चार किलोमिटर स्तरोन्नति सम्पन्न गर्ने लक्ष्य राखिएकोमा हालसम्म २.५ किलोमिटर मात्रै पक्की भएको छ । वर्षाका कारण बितेका हप्तामा काम हुन नसक्दा लक्ष्य पूरा हुन नसकेको कार्यालयका इन्जिनियर सुमन योगेशले बताए । निर्माण व्यवसायीको ढिलासुस्तीका कारण उक्त सडक निर्माण प्रभावित हुँदै आएको थियो । सडक कार्यालयले नयाँ कम्पनीसँग सम्झौता गरेसँगै सडक निर्माणले तीव्रता पाएको छ ।