काठमाण्डौँ । सार्वजनिक खरिद अनुगमन कार्यालयले कान्छाराम कन्स्ट्रक्सन कम्पनी प्रालि सहित ९ वटा निर्माण व्यवसायी तथा आपूर्तिकर्तालाई कालोसूचीमा राख्ने निर्णय गरेको छ । प्रधानमन्त्री तथा मन्त्रिपरिषद्‌को कार्यालयअन्तर्गत रहेको कार्यालयले विभिन्न सार्वजनिक निकायको सिफारिसका आधारमा सार्वजनिक खरिद ऐन, २०६३ को दफा ६३ को उपदफा १ बमोजिम कालोसूचीमा राख्ने निर्णय भएको बिहीबार एक सूचनामार्फत जानकारी गराएको छ । 

सूचना प्रकाशित भएको मितिदेखि लागू हुने गरी कालोसूचीमा परेका निर्माण व्यवसायी तथा आपूर्तिकर्ताहरूले तोकिएको अवधिभर कुनै पनि सार्वजनिक निकायको खरिद कारबाहीमा भाग लिन नपाउने जनाइएको छ ।

कालोसूचीमा परेकामध्ये कान्छाराम कन्स्ट्रक्सन कम्पनी प्रा।लि।लाई १ वर्षका लागि कालोसूचीमा राखिएको छ । त्यस्तै क्यापिटल इन्टरप्राइजेजलाई ६ महिनाका लागि कालोसूचीमा राखिएको छ ।

आर्टिक कन्ट्रक्सन र ग्रीन वर्ल्ड कन्स्ट्रक्सनलाई १–१ वर्षका लागि कालोसूचीमा राखिएको छ । यस्तै  अग्रिम–लङभिजन–धनलक्ष्मी जे।भी। अन्तर्गतका निर्माण कम्पनीहरूलाई ६ महिनादेखि १ वर्षसम्मका लागि कालोसूचीमा राखिएको छ ।  मार्सेली निर्माण सेवालाई पनि १ वर्षका लागि कालोसूचीमा राखिएको कार्यालयले जनाएको छ ।

सार्वजनिक खरिद अनुगमन कार्यालयका अनुसार कालोसूचीमा परेका कम्पनीहरूले तोकिएको अवधिभर सार्वजनिक निकायसँग सम्बन्धित कुनै पनि ठेक्का, आपूर्ति वा परामर्श सेवामा सहभागिता जनाउन नपाउने सूचनामा उल्लेख छ ।