काठमाडौँ । नेपाली कांग्रेसका महामन्त्री प्रदीप पौडेलले नेपाली कांग्रेस देशको विकासको नेतृत्व लिन तयार रहेको बताएका छन् । पौडेलले भने, ‘नेपाली कांग्रेससँग नागरिकका गुनासा छन् । अपेक्षा झन् धेरै छन् । नागरिकका गुनासा सम्बोधन गर्दै अब अपेक्षाअनुसारको समृद्धि दिने बाटोमा हामी छौँ ।’

आमनिर्वाचन २०८२ का लागि देश विकासको भिजन समेटिएको घोषणापत्र तयार भइरहेको र यसले नागरिकका चाहना सम्बोधन गर्दै देशको आगामी मार्गचित्र तय गर्ने उनले बताए । ‘नागरिकको अपेक्षाअनुसार देश बदल्ने यात्रामा प्रमुख १० प्राथमिकता तय गरेर हामी अघि बढ्दै छौँ। तपाईँ सबैको साथ अपेक्षा गरेका छौँ,’ उनले थपे ।

देशभर कांग्रेसका उम्मेदवारहरू चुनावी मैदानमा अघि बढिरहेका छन् । पौडेलले फेरिएको नीति र नेतृत्वले पार्टीमा नयाँ ऊर्जा दिएको बताए । काठमाडौँ(५ का सांसदका रूपमा उनले विगतमा इमानदार भएर क्षेत्र र राष्ट्रको विकास तथा नीति निर्माणमा काम गरेको स्मरण गर्दै, असल अभ्यासको निरन्तरता दिँदै अझ धेरै काम गर्ने लक्ष्यसहित मैदानमा उत्रिएको बताए ।