मिडियाबाजी डटकम काठमाडौँ जेठ २, जिल्ला प्रहरी कार्यालय चितवनका प्रमुख प्रहरी उपरीक्षक (एसपी) गोविन्द पुरी र प्रहरी नायब उपरीक्षक (डिएसपी) रविन्द्र खनालको एकैसाथ सरुवा भएको छ। प्रहरी प्रधान कार्यालयले हिजो (शुक्रबार) एकसाथ देशभरका ४६ एसपी र १४९ डिएसपीको सरुवा गर्दा उक्त सूचीमा पुरी र खनाल परेका हुन्। उनीहरूलाई क्रमशः पुरीलाई काजमा  नेपाल प्रहरी प्रधान कार्यालय अपराध अनुसन्धान विभाग नक्साल,काठमाडौँमा   र खनाललाई   काठमाडौँ उपत्यका ट्राफिक प्रहरी कार्यालय, रामसाहपथ काठमाडौँमा सरुवा गरिएको छ।

चितवनमा अब प्रहरीको नेतृत्व गर्न प्रहरी उपरीक्षक रामेश्वर पौडेल आउने भएका छन्। पौडेल हाल काठमाडौँको महारजगञ्जस्थित राष्ट्रिय प्रहरी प्रशिक्षण प्रतिष्ठान तालिम शाखामा थिए।  रिक्त हुने डिएसपीको दरबन्दीमा चन्द्र भुसन यादवलाई खटाइने प्रहरी प्रधान कार्यालयको सूचनामा उल्लेख छ। यादव हाल लागूऔषध नियन्त्रण ब्युरो मानव स्रोत  व्यवस्थापन शाखा कोटेश्वर, काठमाडौँ शाखामा कार्यरत छन्।