ब्याटिङ ‘कोल्याप्स’ ले डुबायो नेपाल ए, ओमानसँग ७० रनले हार

काठमाडौँ । माथिल्लो मुलपानी मैदानमा भएको अभ्यास एकदिवसीय खेलमा नेपाल ए ओमानसँग ७० रनले पराजित भएको छ। २८१ रनको लक्ष्य पछ्याएको नेपाल २१० रनमै अलआउट भयो।

नेपालले उत्कृष्ट सुरुवात गर्दै एक समय १७७–२ को बलियो अवस्थामा पुगेको थियो। तर त्यसपछि केवल ३३ रन थप्दा ८ विकेट गुमाउँदै टिम ‘कोल्याप्स’ मा गयो र जित हातबाट फुस्कियो।

ओपनर अनिल साह (५०) र तृतराज दास (३१) ले राम्रो सुरुवात दिलाएका थिए भने इशान पाण्डे (५२) र देव खनाल (४३) ले पनि जितको आधार बनाएका थिए। तर मध्यक्रम र तल्लोक्रम पूर्ण रूपमा असफल हुँदा नेपाल दबाबमा पर्‍यो।

यसअघि टस जितेर ब्याटिङ गरेको ओमानले २८० रनको प्रतिस्पर्धात्मक योगफल बनाएको थियो। कप्तान जतिन्दर सिंह (५८) र मुजिबुर अली (७२) को उत्कृष्ट प्रदर्शनले ओमान बलियो स्थितिमा पुगेको थियो। खेलपछि कप्तान अनिल साहले सेट ब्याटरले खेल ‘फिनिस’ गर्न नसक्नु हारको मुख्य कारण रहेको बताए। नेपाल ए का लागि यो हारले ब्याटिङ स्थिरता र खेल सम्हाल्ने क्षमतामा गम्भीर प्रश्न उठाएको छ।