विराटनगर । मोरङको विराटनगरस्थित नोबेल मेडिकल कलेज अस्पताल भवनको पाँचौँ तलाबाट खसेर एक चिकित्सकको मृत्यु भएको छ । नोबेल मेडिकल कलेजमा कार्यरत सप्तरी निवासी इन्टर्न डाक्टर अमित यादवको आज बिहान ६ बजेतिर अस्पतालको भवनबाट खसेर मृत्यु भएको अवस्थामा शव फेला पारेको जिल्ला प्रहरी कार्यालय मोरङले जनाएको छ ।

उनले अस्पतालको पाँचौं तलाबाट हाम फालेर आत्महत्या गरेको हुनसक्ने प्रहरीको अनुमान छ । अस्पतालको पाँचौँ तलाबाट खसेका यादव मेन गेट अगाडि भेटिएका थिए । टाउकोमा गम्भीर चोट लागेका यादवलाई तत्कालै आकस्मिक कक्षमा लगिएकोमा उनको मृत्यु भएको जिल्ला प्रहरी कार्यालय मोरङका डीएसपी कोपिला चुडालले जानकारी दिइन् । सप्तरीको राजविराज नगरपालिका वडा नम्बर ९ घर भएका यादवले मानसिक औषधि समेत खाँदै आएको उनका बुबा शम्भुप्रसाद यादवले जानकारी दिएका छन् ।

अस्पताल प्रशासनले यस बारेमा बुझ्ने काम भइरहेको जनाएको छ। घटनास्थलमा प्रहरी परिचालन गरिएको र घटनाका बारेमा थप अनुसन्धान भइरहेको प्रहरीले जनाएको छ । अस्पताल प्रशासनलेसमेत डाक्टर यादवमा मानसिक समस्या रहेको जनाएको छ ।