काठमाडौँ । दाङमा एक किशोरको हत्या आरोपमा ३ जना पक्राउ परेका छन् । पक्राउ पर्नेमा २० वर्षीय सन्दीप वली, १८ वर्षीय निश्चल चौधरी र १८ वर्षीया आकृति बुढा रहेका छन् । प्रारम्भिक अनुसन्धानमा भेट्न बोलाएर कुटपिट गर्ने क्रममा राप्ती गाउँपालिका–२ बाह्रखुट्टीका १७ वर्षीय स्मिथ प्रधानको बिहीबार राति हत्या भएको प्रहरीले जनाएको छ ।

स्मिथलाई नियन्त्रणमा लिएर हात बाँधिएको, मुख थुनेर चक्कुले पटक–पटक आक्रमण गरिएको र त्यसपछि शव नालामा फालिएको प्रहरीले जनाएको छ ।

स्मिथका साथी १६ वर्षीय आयुषमान थापा मगर घाइते भएका छन् । उनलाई प्रारम्भिक उपचारपछि थप उपचारका लागि बुटवल पठाइएको छ ।