१६६ संस्थालाई १६ प्रकारका खनिज उत्खनन गर्न अनुमति

काठमाडौँ । खानी तथा भूगर्भ विभागले विभिन्न १६ प्रकारका खनिजजन्य वस्तुको उत्खननका लागि अनुमति प्रदान गरेको छ । स्वदेशमा रहेका खनिज सम्पदाको अन्वेषणमार्फत खनिजजन्य उद्योगको विकास गर्दै औद्योगिक उत्पादन र आर्थिक वृद्धिमा टेवा पुर्‍याउने उद्देश्यले अनुमति दिइएको विभागले जनाएको छ ।

गत आर्थिक वर्षसम्म विभागले टुर्मालिन, टल्क, क्वार्ज, काइनाइट, मार्बल, फलाम, जिंक, क्वार्जजाइट, म्याग्नेसाइट, डोलोमाइट र तामालगायत खनिज उत्खननका लागि अनुमति दिएको छ । खानी प्रस्तावको अध्ययन गरी आवश्यक प्रक्रिया पूरा गरेका निजी तथा स्वदेशमा दर्ता भएका विभिन्न अन्तर्राष्ट्रिय कम्पनीसमेत गरी १६६ संस्थालाई इजाजत प्रदान गरिएको सूचना अधिकारी नारायण बाँस्कोटाले जानकारी दिए ।

विभागले खानी अनुमति प्रदान गर्दा वातावरणीय प्रभाव न्यून रहने, उत्पादनअनुसार राजस्व संकलन हुने तथा स्थानीय समुदायलाई लाभ पुग्ने गरी सर्तहरू निर्धारण गर्ने गरेको जनाएको छ ।