मिडियाबाजी डटकम काठमाडौँ , भाद्र ६ । मकवानपुरको मनहरी गाउँपालिका-६ प्रतापुरमा एक बाघ मृत अवस्थामा फेला परेको छ ।
स्थानीय बलबहादुर राईको गोठमा रहेको एकवटा भैंसीमाथि बाघले आक्रमण गरेको र सोही गोठमा बाघ मृत फेला परेको जानकारी प्राप्त भएको जिल्ला प्रहरी कार्यालय मकवानपुरले जनाएको छ । घटनामा भैंसी घाइते भएको प्रहरीले जनाएको छ ।
घटना आज बिहान भएको प्रहरीले जनाएको छ । इलाका प्रहरी कार्यालय मनहरीलाई खबर प्राप्त हुनासाथ प्रहरी, पर्सा वन्यजन्तु आरक्षणको टोली र नेपाली सेनाको टोली घटनास्थलमा पुगेको थियो । प्रारम्भिक अनुसन्धानबाट बाघ बुढो रहेको र भैंसीले हान्दा मृत्यु भएको जस्तो देखिएको बताइएको छ । घटनास्थल चितवन राष्ट्रिय निकुञ्जको क्षेत्रभित्र पर्दछ ।
यसैबीच, चितवन राष्ट्रिय निकुञ्ज सुरक्षार्थ खटिएको नेपाली सेनाको टोलीले मृत बाघलाई आफ्नो जिम्मामा लिएर गएको जिल्ला प्रहरी कार्यालय मकवानपुरले जनाएको छ ।
