मिडियाबाजी डटकम,काठमाडौं महानगरपालिका–२९ स्थित भृकुटीमण्डपमा बुधवार साँझ नियन्त्रणमा आएको भनिएको आगो फेरि सल्किएको छ । बिहीबार बिहान पुनः आगो लागेपछि दुईओटा दमकलको सहायताले नियन्त्रणमा लिइएको जिल्ला प्रहरी परिसर काठमाडौंका प्रवक्ता (एसपी) दिनेशराज मैनालीले रातोपाटीलाई बताए ।
एसपी मैनालीका अनुसार अहिले आगो पूर्णरुपमा निभाइएको छ । समाजकल्याण परिषद्को गोदाम घर र राष्ट्रिय अपाङ्ग कोषको कृत्रिम मानव अंगहरु राखिएको गोदाम घरमा आगलागी हुँदा त्यहाँका सामान पुर्णरुपमा जलेका छन् । समाजकल्याण परिषद्को महत्वपूर्ण कागजात पनि जलेको जिल्ला प्रहरी परिसर काठमाडौंले जनाएको छ ।
कागजात, गोदाममा राखिएको ह्विलचेयर र कृत्रिम मानव अंगहरु ठुलो परिमाणमा जलेको भएपनि अहिलेसम्म क्षतिको यकिन विवरण आएको छैन । बुधवार साँझ लागेको आगो निभाउन ८ वटा दमकल र ३० वटा पानी ट्याङ्कर परिचालन गरिएको थियो ।आगो लागेको सूचना पाएपछि जिल्ला प्रहरी परिसर काठमाडौंका एसएसपी भरतबहादुर बोहरा नेतृत्वको प्रहरी टिम घटनास्थलमा पुगेका थिए ।
आगलागी नियन्त्रणमा १२० जना प्रहरी, १ सय जना सैनिक, ३० जना काठमाडौं महानगरका नगर प्रहरी र सशस्त्र प्रहरीहरु उल्लेख्य संख्यामा परिचालन गरिएको थियो ।आगलागीको कारण र क्षतिबारे प्रहरी वृत सिंहदरबारले अनुसन्धान गरिरहेको परिसर काठमाडौंका एसपी मैनालीले जानकारी दिए ।
