असोज १५ सल्यान / सल्यानमा जिपको ठक्करबाट २ जना विद्यार्थीको मृत्यु भएको छ,भने ३ जना विद्यार्थी घाईते भएका छन । मृत्यु हुनेमा शारदा नगरपालिका ६ बरला बस्ने अन्दाजी १८ बर्षिया रेखा बुढाथोकी र सोही ठाउँका अन्दाजी १८ बर्षिया सुनिता नेपाली रहेको जिल्ला प्रहरी कार्यालय सल्यानले जानकारी दिएको छ ।
प्रहरीका अनुसार घाईते हुनेमा सोहि ठाउँका १८ बर्षिया मिना परियार, १६ बर्षिया सुशीला नेपाली र १८ बर्षिया दिपा बुढाथोकी रहेका छन । उनीहरुलाई थप उपचारका लागी नेपालगन्ज रिफर गरिएको प्रहरीले बताएको छ । बागचौरबाट खलंगा जादै गरेको लु २ च ५७०१ नम्बरको जिपले शुक्रवार विहान १० बजे राप्ती राजमार्ग अन्तर्गत शारदा नगरपालिका २ बाङ्गेसल्ला स्थित उनीहरुलाई ठक्कर दिएको प्रहरीले बताएको छ ।
शिवजन माध्यामिक विद्यालय सितलपाटिमा अध्ययनरत ५ जना छात्राहरु विद्यालय जाने क्रममा बाङगेसल्लाको छहारी मुनि बसेको समयमा जिपले ठक्कर दिएको थियो । जिपको ठक्करबाट गम्भिर घाईते भएका २ जनालाई उपचारका लागी अस्पताल लैजादै गर्दा बाटोमै ज्यान भएको प्रहरीले बताएको छ ।
ठक्कर दिने जिप घटनास्थलमा रहेको छ,भने चालक प्रहरीको नियन्त्रणमा रहेको प्रहरीले बताएको छ । प्रहरीका अनुसार जिप ब्रेक फेल भई दुर्घटना भएको प्रारम्भिक अनुमान गरिएको छ । यसैविच पिडित पक्षले दोषीलाई कडा कारवाहीको माग गदै राप्ती राजमार्ग अवरुद्ध पारेका छन ।
