मिडियाबाजी डटकम काठमाडौँ, फागुन २५। माओवादी केन्द्रबाट साकेला गाउँपालिका–४ मात्तिमका वडाध्यक्षमा विजयी भएका अर्जुनकुमार कटवाललाई जानकारी बिनै अमेरिका बसेको भन्दै निलम्बन गरिएको छ । माओवादी केन्द्र कोशी प्रदेश समितिले खड्कालाई अनिश्चितकालका लागि निलम्बन गरेको हो ।
एक वर्षदेखि पार्टी र सम्बन्धित निकायलाई जानकारी नदिई अमेरिका बसेपछि पार्टीले फर्किएर कार्यभार सम्हाल्न आग्रह गर्दा समेत बेवास्ता गरेको भन्दै प्रदेश समितिले निलम्बन गरेको माओवादी केन्द्र खोटाङका संयोजक दीपक पाण्डेले जानकारी दिएका छन् । २०८० माघ १७ गतेदेखि जानकारी बिनै अमेरिका बसेको र जनताको काममा समस्या भएको भन्दै कारबाहीका लागि माओवादी केन्द्र साकेला गाउँपालिका कार्यसमितिले गत पुस–११ गते सिफारिस गरेको पाण्डेले बताए ।
वडाध्यक्ष अनुपस्थित हुँदा जनताले पाउने सेवा, सुविधा, विकास निर्माण लगायतका सम्पूर्ण सेवा प्रभावित भएको भन्दै स्थानीयले आन्दोलन गर्दै आएका थिए । भ्रमणमा अमेरिका छिरेका कटवाल नफर्केपछि मात्तिमका पूर्व वडाध्यक्ष कृष्णप्रसाद भट्टराईको संयोजकत्वमा गठित सर्वदलीय-सर्वपक्षीय समितिले तत्काल समस्या समाधान गर्न माग गर्दै गत कात्तिकमा वडा कार्यालयमा तालाबन्दी समेत गरेका थिए । कटवाल २०७९ सालमा पनि साढे दुई महिना अमेरिका बसेर फर्किएका थिए । त्यसबेला कटवालले वडा सदस्यलाई कार्यवाहक तोकेर गएका थिए ।
