एनपीएलको दसौँ दिन : आज पनि दुई खेल हुँदै

मिडियाबाजी डटकम काठमाडौँ , मंसिर २६ ।  काठमाडौँमा जारी नेपाल प्रिमियर लिग एनपीएलको दसौँ दिन बुधबार पनि दुई खेल हुँदै छन् ।
सदाझैँ कीर्तिपुरस्थित त्रिवि क्रिकेट मैदानमा हुने खेल बिहान ९ बजे सुरु हुने पहिलो खेलमा शीर्ष स्थानमा रहेको जनकपुर बोल्ट्स र दोस्रो स्थानमा रहेको सुदूरपश्चिम रोयल्स भिड्दै छन् ।

लिगमा अपराजित रहेको जनकपुर लगातार पाचौँ जित हासिल गर्ने दाउमा छ। सन्तुलित टोलीका रूपमा देखिएको जनकपुर पाँचौँ जितसँगै प्लेअफ पुग्ने पहिलो टोली बन्न चाहन्छ । आजको यो खेलमा आशिफ र आरिफ शेख आमनेसामने हुनेछन् । उनीहरू सहोदर दाजुभाइ हुन् । भाइ आशिफ जनकपुरका मार्की खेलाडीसमेत हुन् भने दाजु आरिफलाई सुदूरपश्चिमले अक्सनबाट भित्र्याएको हो ।

उपाधि दाबेदारका रूपमा हेरिएको जनकपुर अनिल शाहको कप्तानीमा मैदान उत्रिँदै छ।लिगका तीन खेलमा २ मा जित र १ मा हार भोगेको सुदूरपश्चिम ६ अंकका साथ तालिकाको दोस्रो स्थानमा छ । राष्ट्रिय टोलीका अलराउन्डर दीपेन्द्रसिंह ऐरीको कप्तानीमा रहेको सुदूरपश्चिम चौथो जितका साथ प्लेअफ सम्भावनालाई बलियो बनाउन चाहन्छ ।