मिडियाबाजी डटकम काठमाडौं, भाद्र ११ । नेपाली राष्ट्रिय क्रिकेट टीमका क्रिकेटर सन्दीप लामिछाने आज सोमबार पाकिस्तान जाँदैछन् ।
सन्दीप यसअघि आफ्नो मुद्दामाथिको सुनुवाइको कारण नेपाली राष्ट्रिय टीमसँगै पाकिस्तान गएका थिएनन् । हिजो आइतबार सन्दीपविरुद्धको मुद्दा हेर्न नभ्याईनेमा रहेपछि उनी पाकिस्तान जान लागेका हुन् । उनी आज बिहान ११ः२० बजे कतार एरलाइन्सबाट पाकिस्तान जाने तयारीमा छन् ।
सन्दीप दोहा हुँदै आजै पाकिस्तानको मुल्तान पुग्ने नेपाल क्रिकेट संघ (क्यान)ले जनाएको छ ।
आउँदो बुधबार भदौ १३ देखि ३१ गतेसम्म पाकिस्तान र श्रीलंकामा आयोजना हुने प्रतियोगितामा सहभागिता जनाउन नेपाली टोली गत भदौ ६ गते पाकिस्तान पुगेको थियो ।
पहिलो पटक एसिया कप खेल्न लागेको नेपाल समूह ‘ए’ मा रहेको छ । नेपालको समूहमा भारत र पाकिस्तान छन् । त्यस्तै समूह ‘बी’मा श्रीलंका बंगलादेश र अफगानिस्तान रहेका छन् ।
नेपालले आफ्नो समूहको पहिलो खेल पाकिस्तानमा खेल्नेछ भने दोस्रो खेल श्रीलंकामा खेल्नेछ ।
नेपाल र पाकिस्तानबीचको पहिलो खेल भदौ १३ गते हुनेछ भने दोस्रो खेल भारतसँग हुनेछ । नेपाल र भारतबीचको खेल भने भदौं १८ गते श्रीलंकामा हुनेछ ।
