मिडियाबाजी डटकम काठमाडौं, माघ ११ । स्थानीय एवम् राष्ट्रियस्तरका धावक सम्मिलित हुने खुल्ला दौड प्रतियोगिता बेलकोटगढीको झिल्टुङमा हुने भएको छ । “जे गरौ, गज्जबले गरौ” नारासहित सातौँ झिल्टुङ क्रस कन्ट्री दौड यहि माघ १४ गते शनिबार हुने भएको हो । बेलकोटगढी नपा वडा नम्बर ५ का वडा अध्यक्ष मदन भुजेलले समुदायस्तरमा दौडलाई सांस्कृतिक एवम् पर्यटन प्रबर्द्धनको निमित्त यसवर्षदेखि वडाले जिम्मेवारी लिएको बताए ।
हरेक वर्ष आयोजना हुने प्रतियोगितामा साढे १३ किमि खुला महिला र पुरुषतर्फको दौड छ भने साढे १३ किमि खुला स्थानीय पुरुषतर्फको दौड रहेको छ । यसैगरी १६ वर्षमुनिका छात्र,छात्रातर्फ साढे ४ किमि खुला जुनियर दौड, १६ वर्षमुनिका स्थानीय छात्रा,छात्र दौड तथा साढे ४ किमि स्थानीय ४५ वर्षमाथिका पुरुषको दौड र भेट्रान खुला साढे १३ किमि पुरुषतर्फको दौड प्रतियोगिता रहेको छ । त्यसैगरी स्थानीय आमा समूहको साढे ४ किमि दौड प्रतियोगितासमेत राखिएको वडाध्यक्ष भुजेलले बताए ।
साढे १३ किमि खुला महिला तथा पुरुषतर्फको पहिलो पुरस्कार राशि १५ हजार, दोस्रो १० हजार र तेस्रो ५ हजार रहेको छ भने साढे १३ किमि स्थानीय खुला महिलातर्फको पहिलो, दोस्रो र तेस्रो पुरस्कार राशि क्रमशः १०, ७ र ५ हजार राखिएको छ । साढे ४ किमि स्थानीय आमा समूहतर्फको पुरस्कार राशि पहिलो, दोस्रो र तेस्रो हुनेलाई क्रमशः १२, ९ र ६ हजार रुपैयाँ राखिएको छ ।
दौडमा सहभागी हुनका लागि वडा कार्यालय र काठमाडौंका लागि त्रिपुरेश्वरस्थित वर्ल्ड ट्रेड सेन्टरको दोस्रो तल्लामा रहेको सम्पर्क कार्यालयमा नाम दर्ता खुला गरिएको आयोजकले जनाएका छ ।
