मिडियाबाजी डटकम काठमाडौं,पौष २५ । कारागारमा क्षमताभन्दा बढी कैदी र थुनुवा राखिँदा स्वास्थ्य सेवा, पोषणलगायत सुविधाको अभाव देखिएको छ । उचित स्वास्थ्य सेवा र पोषण अभावमा कतिपय कैदी र थुनुवाको ज्यान जोखिममा परेको पाइएको छ । अहिले देशभरिका कारागारमा २७ हजार कैदीबन्दी छन् ।
देशभरिका कैदीबन्दीकालागिसुविधायुक्त अस्पताल भने एउटा मात्रै छ । यसले गर्दा कैदीबन्दीले बिरामी पर्दा समयमै सेवा पाउन सकेका छैनन् । काठमाडौँ सुन्धारास्थित केन्द्रीय कारागार अस्पताल ३० शय्याको छ । अन्य कारागारमा प्राथमिक स्वास्थ्य जाँचपछि गम्भीर प्रकृतिका बिरामीलाई केन्द्रीय कारागार अस्पताल ल्याएर उपचार गर्ने व्यवस्था छ ।
केन्द्रीय कारागार अस्पतालमा बिरामीको चापले गर्दा समयमै भरपर्दो सेवा पाउन कठिन छ । बिरामी कैदीबन्दीको उपचारसँगै पोषणमा राज्यले पर्याप्त ध्यान दिन नसक्दा कतिपयको मृत्यु हुने गरेको छ । कैदीबन्दीको नियमित स्वास्थ्य जाँच र बिरामी पर्दा पोषणयुक्त खानेकुराको प्रबन्ध मिलाउनुपर्ने राज्यको दायित्व हो । तर त्यो दायित्व पूरा गर्नबाट राज्य चुकेको छ । आजको नागरिक दैनिकमा समाचार छ ।
