मिडियाबाजी डटकम काठमाडौं, पौष ४। प्रत्यक्ष (लाइभ) दोहोरीमा अश्लील र छाडा गीत गाउने कलाकारहरूलाई राष्ट्रिय लोक तथा दोहोरीगीत प्रतिष्ठानले सूची तयार पारी कारवाही गर्ने भएको छ ।
पछिल्लो समय युट्युबबाट पैसा कमाउने लोभमा बालबालिकाहरूलाई पनि छाडा गीत गाउन लगाएको गुनासो आइरहेको भन्दै अध्यक्ष बिजीले लोकदोहोरीलाई मर्यादित तुल्याउन आफूहरू गम्भीर भइरहेको बताएका छन् ।कारवाहीको सूचीमा परेका कलाकारहरूलाई संस्थाको सेवासुविधा र पुरस्कारबाट वञ्चित गरिने भएको छ ।
‘सामाजिक सद्भाव भड्काउने कलाकारलाई कारवाही गर्नेतर्फ अघि बढेका छौं,’ उनले भने, ‘पैसाभन्दा ठूलो कुरा नैतिकता हो । यसको संकट देखिएको छ ।’बालबालिकाको प्रयोग नगर्न भन्दै संस्था इन्द्रेणी लगायतका कार्यक्रमलाई आग्रह गरेको उनले भने । विगतमा प्रत्यक्ष (लाइभ) दोहोरीमा छाडा गीत नगाउने प्रतिबद्धता जनाएका कलाकारले आफ्नै प्रतिबद्धतालाई बिर्सने गरेको समेत उनले गुनासो गरेका छन् ।
