मिडियाबाजी डटकम काठमाडौं, असोज २९ । आगामी मंसिरमा हुने प्रतिनिधि सभा तथा प्रदेश सभा निर्वाचनका लागि उम्मेदवारी मनोनय गरिसकेका विभिन्न दलका तथा स्वतन्त्र उम्मेदवारहरूले पछिल्लो समय चुनावी घरदैलो कार्यक्रम अभियान सुरु गरिसकेका छन् ।
पछिल्ला दिनमा व्यापक घरदैलो अभियानमा लागेका त्यस्तै, एक उम्मेदवार हुन्, गणेश शाक्य (कुमार) । काठमाडौं निर्वाचन क्षेत्र नम्बर ६ को प्रदेश सभा ‘क’मा जनता समाजवादी पार्टीबाट उम्मेदवारी दिएका कुमार शाक्यसँग प्रतिस्पर्धामा छन्, कांग्रेसबाट हरिप्रभा खड्का र एमालेबाट नितेश सिंह । कुमार शाक्य एक सफल र कुशल युवा व्यवसायी हुन्, उनले यो भन्दा अगाडीका चुनावहरुमा धेरै नेता साथीभाईहरूलाई सहयोग र सल्लाह सुझाव दिए, तर, आफ्ना विचार प्रस्तुत गर्न आफै चुनावी मैदानमा उत्रनुको विकल्प देखेनन् उनले ।
यही सन्दर्भमा ताजा बहसले शाक्यलाई प्रश्न गरेको थियो– तपाईंलाई किन प्रदेशमा सांसद बनाएर जनताले पठाउने ?‘मैले जनतासँग रहेर यतिका वर्ष काम गरेँ, समाजसेवीका रुपमा मैले यहाँकै जनताको सुखदुःखमा साथ दिएको छु,’ शाक्यले भने, ‘व्यक्तिगत र पार्टीको तर्फबाट कतिपय काम गरेको भए पनि राज्यस्तरबाट काम गर्नका लागि संसदीय राजनीतिको महत्व भएको देशमा सांसद हुनै पर्ने हुन्छ । त्यसैले जनता र विकासको पुलको रुपमा म काम गर्न सक्छु भन्ने दृढता छ । यही मेरो अठोट पूरा गर्नका लागि मलाई यहाँका जनताले मत दिनुहुन्छ भन्ने विश्वास पनि छ ।’
राजधानी काठमाडौं मै जन्मि हुर्केका शाक्यले विभिन्न संस्थामार्फत् तथा व्यक्तिगत रुपमा बाढीपहिरो, डुबानको समयमा होस् या कोरोनाभाइरसजस्ता महामारी फैलिँदा किन नहोस्, बारम्बार अग्रपंक्तिमा देखिएका हुन्छन् शाक्य ।‘जनतासँग मैले सधैं समस्या सेयर गरेको छु,’ शाक्यले भने, ‘सकेको समयमा सधैं उहाँहरुसँग भएर उहाँहरूका लागि काम गरेको छु ।’ उनले यसरी काम गर्दा कहिलेकाहीँ नीति तथा नियमहरु नभएका कारण जनताको काम समयमा हुन नसकेको अनुभूत पनि गरेका छन् ।
‘त्यसका लागि प्रदेश सरकारको भूूमिका विशिष्ट हुन्छ, प्रदेश सभा सदस्यको नाताले मैले यहाँका स्थानीय तहसँग मिलेर काम गर्नेछु र केन्द्र सरकारसँग पनि समन्वय गरेर अगाडि बढ्नेछु । म यहाँका जनताका लागि केन्द्र, प्रदेश तथा स्थानीय तीनै तहका सरकारसँग पुल बन्नेछु ।’शिक्षा, स्वास्थ्य, रोजगारी, भौतिक विकासजस्ता विषयमा पनि आफू गम्भीर भएर आफ्नो क्षेत्रको विकासमा ज्यान दिएर लाग्ने आफ्नो अठोट रहेको शाक्यले बताए ।
‘शिक्षा तथा स्वास्थ्यमा यहाँका जनताको समान पहुँच हुनुपर्छ भनेर म लागिरहेको छु,’ उनले भने, ‘रोजगारी, खेलकुद क्षेत्रको विकास तथा यो क्षेत्रको सम्मुनत विकास नै मेरो लक्ष्य हो । त्यसलाई म अगाडि बढाउने छु । मैले यहाँका जनताले देखेका सपनालाई पूरा गर्नेछु ।’लोकतन्त्रलाई समावेशी, समानुपातिक र सहभागितामूलक बनाउन आफ्नो पार्टीको प्रयास रहने उनले बताए ।
